Mbaj mënd, isha i vogël
kur m’u afrove ti
përmbi një pullë poste,
e vogla Helveti…

Sa kishim dalë nga lufta,
s’dinim ç’bënim as vetë –
në pullat ndronim shtetet
nga malli për një shtet.

Kish pulla hijerënda
me perandor e car,
rrethuar në kështjella
veshur spaletat ar…

Në ‘tregëtinë’ e vogël
ty si flori të kishim,
(gjitonët sllavë e grekë
me gjysëm çmim i shisnim).

Cdo pullë, disi lehtë
këmbenim shok me shok.
Ty bashkë me Vilhelm Telin
të mbanim fort në bllok.

Diçka na thosh, se ngjaje
me ne, me Shqipëri,
e largëta e afërt,
simotra ‘Helveti’…