Mbani akoma aromë bebi bijtë e mi,
në shpirt ka lëshu’ rrënjë kjo aromë,
si shqerrat lodroni gjithë jetën në gji,
aty do të mbeteni fëmijë përgjithmonë.

Ju rriteni nga dita në ditë bijtë e mi,
në krahë nuk mundem më t’ju mbaj,
por në duart e mia jeni akoma kërthi,
në çaste të vështira për dore ju mar.

Hapni krahët, fluturoni lart e më lartë,
pa frikë, qiellit ia kam përpirë retë,
petka të arta kam shtruar mbi baltë,
urë që bashkon brigje bëhem vetë.

Mbani aromë bebi bijtë e mi,
parajsë ku kundërmojnë jasemi.