Xhelozia e një femre
si egërsi e çakallit,
ajo bëhet plagë zemre
të nxjerr dhe djersën e ballit..

Sa fustane ke parë sot ?
terë ditën duke bredhur,
Ti nuk paske mënd në kokë
more burri bisht përdredhur..

Kush është ajo që i fole ?
atë nuk e njoh as unë,
ndaj më del i pispillosur
dhe më thua se kam punë..

Ti dhe kur del me mua
i bën sytë si mace hiri,
harron se më ke për grua,
po s`më shpëton gjë nga syri..

Më ke lënë edhe mustaqe
që të dukesh namuzli,
po ti s`paske cipë në faqe,
nuk të dija kaq qefli..

Unë do qaj e do bërtas
sikur do të fut në dhe,
ta marrë vesh edhe mëhalla,
të të njohin se kush je...