Gjysma ime ngeli peng
Në një gjysëm shpirti tjetër
Më ler kohë, më gjej një vend
Ku ta qaj një mall të vjetër.

Gjysma ime lëngoi gjatë
Në kërkim të gjysmës vet
Tretej loti për një natë
Shteronte sytë në aq net.

Gjysma ime si strofë pa varg
Ish pa rimë, pa ndjesi
Gjysmën tjetër kërkonte larg
Si pa titull një poezi.

Gjysma ime ngeli e shkretë
Himnin e vdekjes këndoi në faj
Shpirti im në tjetrën jetë
Do ta gjej gjysmën e saj.