Fytyrëmbla njomzake,
Ballëlyera me dritë
Bukureza fluturake,
pse më step, tek më hedh sytë ?

Të të shoh, nuk nginjem kurrë
Syt' e mi çlodh qeshja jote
Trëndafili yt në buzë
si qëndron e si s'rrëzohet ?

Moj e ëmbëla midis lulesh
Rreze-ar të kullon syri
Hyn në zemër e nuk shkulesh
Midis nesh pranvera hyri .

Më kot stepim njeri-tjetrin
me të rrahurat e zemrës
Vetëm ne ia dimë lezetin,
ç'shije ka vegimi i ëndrrës ...

Bukureza lodërtare,
Mbaje zjarrin ! Mos e shuaj !
As e sertë as manare
Siç të kam, kështu të dua !