Nëse sonte shkoj me zonjën vdekje…
Mos derdh lot për mua,
Gëzo sikur bashkë gëzonim…
Luaj me fjalë siç luanim…
Hyr rutinës të së përditshmes,
Ashtu, krejt pa brenga…

Ti e di…
Besën ta dhashë:
Me ty do të jem…aty!

Dil udhëve t’qytetit
E lëre flladin e mëngjesit të ta akullojë fytyrën…
Dhe dije, atij çasti po të ledhatoj.

Netëve mbushe një gotë verë
E me yjt gëzoju!
“N’vallzim të çartun m’tako!!”

Ëndrrave mos më thirr, mos më kërko…
Unë vetë po e di:
“Kur malli ka me t’pik e duhet me ardh’…

Gëzoju lirisë s’dashnisë
Që me tan’ xhevahiret e virtytit të stolis.

Gëzohu e rro… sikur ditën e fundit me mua!