Si copëza Qielli,
bie nga lart,
dëbora e bardhë.

Shtëpitë, pemët,
rrugët,
makinat shumëngjyrëshe,
dhe gjithçka mbi tokë,
si me një vello nuseje
ajo po mbështjell.

Për fëmijë e të rritur,
e për çdo gjallesë,
si një gëzim të brendshëm
dhe paqe
tashmë bora po sjell.

Si copëza Qielli,
që me Tokën duan të takohen,
vjen dëbora e heshtur.

Si copëza Qielli,
nga Parajsa,
bie nga lart.

E kështu e bardhë,
pa fjalë,
magjepsëse plot mister,
ajo zemrave
të çdo kohe
e çdo kombi iu flet!