Heshtja hedh sytë kudo
Depërton në brendësinë
E gjërave e qenieve

Zbulon dëshira të çuditshme
Iluzione absurde
Zgjon kujtimet
Që rebelohen mbyturazi
Nën pluhurin e harresës

Sheh përmes imazheve të dritës
Ku shpirti përkundet brenda kohës
Pastaj fluturon horizontit

Zhbiron përtej të dukshmes
E më vonë mban ritmin
E asaj që do të vijë
Pa e braktisur trupin
Deri në kthimin e fundit
Në atë pikënisjen e parë të kohës.