Do të kalojë edhe kjo, biri im,
Si kaluan të tjerat.
Se ata që jetën e patën mundim,
Më mirë se kushdo lirisë ia dinë vlerat.

Do të kalojë edhe kjo, është tërbim,
Gjueti si përhera.
Ata po e vrasin çdo ditë vendin tim.
Sa e largët më duket pranvera!

Do të kalojë dhe se plaga të dhemb.
Është veç plagë, e ç’gjë tjetër?...
Më qeshet se dhimbja as ty nuk të tremb.
Histori tashmë shumë e vjetër.

Do të kalojë edhe kjo, biri im,
I ke vitet përpara.
Mos vdis as ti nga një krim pa ndëshkim,
Pa e kthyer atdhenë nga e mbara.

Do të kalojë edhe kjo, do të kalojë,
Zemërhapur lufto për të mirën.
Bota është sferë e vjen rrotull njëlloj.
Bëju diell dhe largo errësirën!