Ç’janë këto ethe maji që shkaktojnë thëllime
Shpirtin ma shkundin e sjellin drithërime
Vijnë si dallgë deti përplasen në kraharor
Fërgëllues ai shikimi yt djeg si meteor

Vjen si rreze dielli e më zhbiron në sy
Si ta përballoj këtë shikim as vet nuk e di
Digjem përvëlohem n’shpirt ndjej tërmet
Rrezëllimi yt ballin ma djeg e syrin ma vret

Kjo ndjenjë përflakje më tundon marrëzisht
Saherë më shikon e më vjedh hajdutërisht
Buzëqeshje hyjnore të shpërthen në ballë
N’timin skiftersy vjen e shkrep xixëstrallë

Aromë erëftua shpërndanë lëkura jote
Marrëzisht më deh lumturi e kësaj bote
Me shikim gazele ti derdh elegancën
Në detshpirtin tënd unë hedh spirancën

Ne zemër me dërgon prushërime qiellore
Nektar ngazëllime erëmime pranverore
Luggjoksin shpalos me finesë mbretëreshe
Fundshpinë zane shpinëshpat perëndeshe

Syri im i pagjumë ndër ëndrra ngatërruar
Buzë plasaritur vapë-etje e pashuar
Përpëlitem në heshtje dhe bluaj kujtime
Rreze-ylli yt shkrep mbi t’miat vegime

S’di pse digjem prush e shpirti merr flakë
Djallushë ëmbëlake ç’më zure në lak
Gjektimë gjëmuese shpërthen shpirti yt
Saherë hedh shikimin më tradhtojnë sytë

S’di ç’do të ndodh po të erdha pranë
Do digjem si eshkë po të ndejta ndanë
Le t’më ngrijë acari apo zjarri t’më djeg
Më tundon zëri yt tek të pres në shteg

Në ëndrra të puth në ëndrra të zhvesh
Zjarrdashurie prafullon mes nesh
S’i përballoj dot këlithmat që s’m lënë të qetë
Prushmalli për ty n’gjoks dhembshëm troket

Rebele ngadalso hapin mos m’huto shikimin
Flokun kur ta kreh era n’sy m’trazon galdimin
Bekuar qoftë Ora që t’dha elegancën
Ah dallgëpirti yt ma këputi spirancën

Syrin keq ma shpon tehshikimi yt
Dot s’i bëj ballë ndaj më lëbyren sytë
Sa herë ti kafshon atë skajbuzë magjike
Në gushën hyjnore pikas bukuri biblike

Mos e ul shikimin ndër ato qepalle
Lugqafa jote bukuri shtojzovalle
U trazuan kujtimet dhe gjumi degëdisi
Malli për ty rri varur në t’blertën degë lisi

Më len të vë faqen ku rreh zemra jote
T’i shmangem në çast unë kësaj pisbote
Të kërkova këtë natëmaji ndër mijëra yje
Malli më zhurrit për aromën luleqershie

Zgjati duart tua t’bardha ato duar të arta
T’i marr n’gji t’i mbuloj me puthje t’zjarrta
Zgjatma qafën tënde atë qafë hyjnie
Të t’fal ca puthje aty ku mjekra t’bën hije

Ajo dritë hyjneshe më shkrep në qepallë
Vargu yt varg muze n’shpirt trazon mallë
Ndaj nis fluturimin mbi lulerudine
Më deh aroma jote erëmim trëndeline