Hëna lundron qiellit dhe majëmalet prek
Rrezja ballin ndrit e vetullën ma djeg

Hedh valle nusehëne mbi lisnajë pyjesh
Pastaj, çapkënçe pas një kepi fshihesh

Të kërkoj me ngulmim pas ca burg-reshë Hajdutçe shfaqesh djallëzisht buzëqeshë

Dirgjem lëndinës ku vjeshta ngjyra derdh
Pas zërit tënd magjik i përhënur bredh

Mos prito! eja rrezehënë, e ma gris natën
Me këngë laureshe ma shuaj afratën

Të kërkoj ndër fusha t'kërkoj ndër zabele
Vjen me hap drenushe ik me vrap gazele

Flakë më digjet shpirti prush digjet xhani
Vargun t'kam vënë lak, ty fëllënzë shullani