Ne do të përballemi prapë me netët e heshtura,
kur fryma të na pushojë
e për të shkuar më tej,
do të shpojmë hapësirat, do të bëjmë çmos.

Kjo s’është se nuk ka ndodhur
e s’është se do ulërijmë.
Këto skena, nuk u bëjnë përshtypje,
heronjëve, të mirëfilltë.

S’është se nata është e pashpirtë,
as se yjet do shuhen të gjithë.
Gjithësia, i ka të tëra brënda,
lindjet, vdekjet dhe dashuritë.

Ne, si përherë, nuk do bëjmë zhurmë,
kur t’na thyhen dhëmbë nga dhimbja,
po qielli do të dëshmojë,
kur të shfaqemi imazhesh, nga pritja.