Sikur të kam gjithë jetën në krahë si flutur
më erdhe si një lajmëtare e rrallë e lumturisë
Ka shumë dhurata bota e madhe e me halle mbushur
po ti mbetesh kryedhurata që më dhe mëmësinë.

Akoma sikur shoh sytë e ty të vegjël me kaq dritë
Je ti Klea, ëndrra më e bukur e jetës sime të jetuar
Mos ki frikë më the në jetën që m’u bë si sfidë
një ditë ajo patjetër ka për t’u realizuar

Ke kapërcyer sfidat e pengesat në rrugët e tua
Për fitoren ke luftuar porsi një luaneshë.
Njëra pas tjetrës kurorat i ke thuruar...
më e mira e më e bukura në jetë të jesh.

Sot ti ke në duar një diplomë të shkëlqyer.
E mbron me dashuri për dijen, me dinjitet,
ti je ngjitur në një shkallë të lartë të përkryer,
dhe gëzimi i një nëne sot prek dhe retë

Ndonjëherë jetës
i kërkojmë më shumë, sa duhet.
Dhe ajo dhimbshëm, ah, sa pak në duar na jep.
Dëshirat rriten e bëhen si një lumë
për fëmijët tanë bëhemi si vullkani që shpërthen.

Dëshirat tona duan valë detesh për t’u shkruar
Hë më thuaj:
a nuk ishe ti, ëndrra që kisha ëndërruar!...