Besuam, një ditë do të ndryshonim botën,
nga gjumi, menduam, njerëzit i shkundëm,
por historisë nuk ja ndërruam rrotën,
lufta kundër Idiotit, mbaroi. Humbëm!

Vazhduam në jetë të firmosnim çdo letër,
pa vrarë mendjen i kryem veprimet,
por, mëkatet paguhen në jetën tjetër,
kësaj jete paguhen vetëm gabimet.

Na mbetet të revoltohemi çdo orë,
pro ndezjes së zjarrit por, kundër flakës,
të ngrihemi kundër zhurmës së çizmes
por edhe kundër heshtjes së shapkës.