Si brez i para '90-ës
Në një ditë me shi,
Më kapi mall i nostalgjisë
Për vitet e vegjëlisë.

Ato vite të bukura
Të fëmijërisë,
Kur, tok me moshatarë,
Rriteshim bashkë çdo ditë.

Aty poshtë pallatit
Gjithë ditën në oborr,
Luanim lojërat tona,
Me këmbë e me dorë.

Ishin vitet kur s’kishim
Asnjë lodër elektronike,
I ndanim midis nesh
Ato prej druri e plastike.

Me imagjinatën tonë,
Plot krijimtari,
Formonim lodrat tona,
Me letra e kartona.

E vrisnim mendjen tonë,
Guxim e fantazi,
Krijonim plot lojëra,
Me shumë dashuri.

Topat tanë
Prej llastiku,
Shpesh i mbushnim
Me lesh jastiku.

Lojërat tona me top
Në portë a në grop,
Zbathur, pa sandale,
Asnjë plagë, fare.

Luanim me pulla poste
Nga të vendit dhe të jashtme,
Lart në ajër i përdridhnim,
Kokë a pil, si të binin.

Po kur luanim
Me kopaca,
Që ishin kopsat
E palltove të gjata…

Shpiknim lloj-lloj lojrash,
Ato me tituj filmash,
E pastaj vijonim
Me targa makinash.

Karrocat me kuzhineta,
Shpikje e paparë,
Sa shumë lart e poshtë,
Ato i kemi ngarë.

Lojërat me pinca
Arrinin kulmin,
Kur majën e saj
Në tokë e ngulnim.

Balonën tahuke
Dhe atë tabake,
Kush më mirë e nxirrte,
Aq më lart e ngrinte.

Kur shikonim filma
Ku luante Herkuli,
Me arkat e markatës
Krijonim shpata druri.

Kapakun e tenxheres,
E kthenim në mburojë.
'Luftonim' njëri - tjetrin,
Imitonim, heronjë.

Loja me peta
Prej guri të sheshtë,
Me shkumës bënim vizat,
Për kuadratet rresht.

Pastaj litarin merrnim,
Dy veta seç e tundnin,
Pasi bënim trenin,
Hidheshim dhe kërcenim.

Loja me cingla druri
Shumë na u vra gjuri,
E godisnim fort,
Që mos e kapnin dot.

Shishes së kosit
i merrnim kapakun,
dhe ashtu, me shapka,
luanim: “Kapaçka”.

Me një tel të fortë rrethor,
E një të gjatë në dorë,
Në fund i bënim një grep,
Rrethin shtynim, ai ecte vet.

Përmes lojës kala dibranëshe
Mbi shpinë u hidheshim,
Shokëve tanë,
Ç'kurriz të fortë kishim!

"E ka kush e ka"
Një lojë shumë aktive,
Sa shumë që vraponim,
Shoku shokun gjëmonim.

Se desh harrova,
"Hapa - dollapa",
Ose "Sylla – mbylla",
Mu aty tek shtylla.

Këto e shumë të tjera
Me mall e nostalgji,
Mu kujtuan befas
Në një ditë me shi…